Súkkulaðimús með appelsínubragði

28. nóvember 2018

Heil og sæl! Ég er komin í hátíðarskap og þá er ekkert annað í stöðunni en að kveikja á jólatónlistinni, setja á sig svuntuna og byrja að baka! Kærastinn minn gerir alltaf súkkulaðimús með appelsínu á jólunum fyrir okkur og hún er guðdómleg! Rjóminn fer hins vegar illa í mig og ég er með ofnæmi fyrir eggjum svo ég ákvað að búa til súkkulaðimús með snúning og sleppa rjómanum og egginu. Ég nota m.a. náttúrulega sætu, döðlur, og engan sykur. Ég nota líka chia fræ til að festa músina aðeins saman í staðinn fyrir matarlím. Ég vil taka það fram að þessi uppskrift er gerð í samstarfi við Himneska Hollustu, Chocolate & Love ásamt Isola Bio. Það er kannski smá kaldhæðnislegt að setja súkkulaðimús undir 'Heilsu' hér á H Magasín en hátíðirnar eru á næsta leiti og mér finnst að maður megi alveg leyfa sér smá óhollustu í hollari búning! Allt er gott í hófi, ekki satt? 

Innihald:

  • 1 plata af 65% súkkulaði með appelsínu frá Chocolate & Love (bræðið, 1 plata er 80 gr.)
  • 10 döðlur frá Himneskri Hollustu (lagðar í heitt bleyti í 5-8 mín.)
  • 2 msk af chia fræjum frá Himneskri Hollustu
  • 1,5 dl af kókosmjólk frá Isola Bio (getið líka prufað aðra plöntumjólk)
  • Safi úr 1/2 appelsínu + appelsínubörkur til að skreyta ef maður er í stuði!
  • Salt eftir smekk (má sleppa)

Sukkuladimus

Aðferð

Setjið allt hráefni í blandara og blandið vel saman. Skrapið reglulega meðfram hliðunum því mjólkin mun slettast. Setjið músina í litlar skálar. Ég notaði 4 litlar skálar frá IKEA úr Skyn línunni, þær eru fullkomnar í eftirréttinn og svo eru þær alveg svakalega sætar! Geymið inn í ísskáp í a.m.k. 1 klukkustund. Það voru smá döðlubitar í músinni minni þar sem blandarinn minn er ekki sá besti en ég hef ekkert á móti smá ljúffengri döðlu með músinni! Rífið örlítinn appelsínubörk yfir eða setjið jafnvel flórsykur eða örlítið kakóduft! Maður þarf alls ekki mikið af þessum eftirrétt til þess að vera saddur og sáttur, lítil skál dugar!

Njótið!

Ef þið viljið fylgjast betur með mér getið þið fylgt mér á Instagram

Þangað til næst, verið heil og sæl! 

 

 Höfundur: Asta Eats