Kasjúhnetusmjör

14. mars 2019

Heil og sæl! Að mínu mati þá fær kasjúhnetan ekki nógu mikið lof en hún er svo ofboðslega ljúffeng! Kasjúhnetur eru meinhollar og næringaríkar en eins og með allar hnetur þá skal borða kasjúhnetur í hófi vegna þess að þær eru jú fituríkar. Ég vil samt taka það fram að fitan úr hnetum er góð fyrir líkamann en hún er ómettuð og slík fita minnkar líkur á hjarta- og æðasjúkdómum. Það liggur við að ég borða kasjúhnetur á hverjum einasta degi en þær eru mitt "go-to" nasl og ég miða við eina lúku á dag. Ég rista þær mjög oft á pönnu en það virkilega dregur fram bragðið en ég hendi þeim líka í salat af og til. Ég hef gert kasjúhnetusmjör áður en þá setti ég líka kakóduft út í og það varð þá að gómsætu súkkulaðihnetusmjöri. Að þessu sinni þá er kasjúhnetusmjörið alveg hreint og ég verð að viðurkenna að það er miklu betra. Ég smakkaði kasjúhnetusmjörið um daginn með banana og ég vissi ekki hvert ég ætlaði, það er SVOOOOOO gott. Það smakkaðist eins og banana kökudeig, þið verðið að prófa. Í samstarfi við Himneska Hollustu þá ætla ég að deila með ykkur uppskriftinni af þessu unaðslegu kasjúhnetusmjöri en það er auðvelt og fljótlegt að gera! Kasjúhnetusmjör er upplagt út á grautinn, smoothie-skálina eða jógúrtið, með ávöxtum eða grænmeti eða jafnvel á rís- eða maískexið.

Innihald:

  • 400 grömm af kasjúhnetum frá Himneskri Hollustu 
  • Salt eftir smekk 

Kasjuhnetur_1552572708980

Kasjuhnetusmjor

Aðferð
Byrjið á því að hita ofninn upp í 160°C og ristið kasjúhneturnar upp úr örlitlu salti í 15 mínútur. Passið að brenna þær ekki. Leyfið hnetunum að kólna aðeins og setjið þær svo í matvinnsluvél og blandið saman.

Fyrst verða kasjúhneturnar að grófu mjöli. Þið þurfið stoppa, skrapa meðfram hliðunum og halda áfram að blanda nokkrum sinnum. Olían fer svo smá saman að losna úr hnetunum og þær verða þá að deigi eða deigkúlu. Haldið áfram að blanda þar til þið fáið áferð sem ykkur líst vel á. Það er góð regla að blanda alltaf örlítið lengur en þú ætlaðir þér, 2-3 mínútum lengur. 

Af einhverri ástæðu þá tekur kasjúhnetusmjörið miklu styttri tíma en þegar ég geri möndlusmjör. Kannski er það vegna þess að kasjúhnetur eru meira "creamy". Ég var 15-20 mínútur að blanda kasjúhnetusmjörið en ég hef verið 40 mínútur að blanda möndlusmjör.

Geymið kasjúhnetusmjörið í lokaðri krukku eða loftþéttu íláti. Það er hægt að geyma það inn í ísskáp eða einfaldlega upp í skáp, á dimmum stað sem ég kýs frekar að gera. Kasjúhnetusmjörið endist í einhverja mánuði, þó mæli ég með að klára það innan 4-5 vikna upp á bragðið. Ég er allavega fljót að tæma mína krukku get ég sagt! Takk kærlega fyrir að lesa færsluna mína og njótið! 

Ef þið viljið fylgjast betur með mér getið þið fylgt mér á Instagram en ég er undir nafninu astaeats. Ef þið prófið þessa uppskrift eða bara hvaða uppskrift sem er frá mér megið þið endilega senda á mig hvernig tókst til. 

Þangað til næst, verið heil og sæl!

Höfundur: Asta Eats