Súkkulaðihnetusmjör

25. apríl 2018

Heil og sæl! Hnetusmjör er í miklu uppáhaldi hjá mér enda er bragðið frábært og heilsueiginleikar hnetusmjörsins eru margir. Flestar ef ekki allar hnetur innihalda holla og góða fitu, þ.e. einómettaða fitu (e. monounsaturated fat) sem lækkar magn LDL kólesterólsins, kallað "vonda kólesterólið“, og hækkar magn HDL kólesterólsins, kallað "góða kólesterólið, og stuðlar þannig að heilbrigðu hjarta- og æðakerfi. Hnetur innihalda einnig gott magn af próteini og trefjum. Þó að hnetur séu meinhollar er ekki mælt með að borða of mikið af þeim. Handfylli af hnetum á dag er tilvalið. Ég hef afskaplega gaman að því að búa til mitt eigið hnetusmjör en ég hef áður deilt uppskrift af möndlusmjöri og sérstöku jólahnetusmjöri gert úr valhnetum og pekanhnetum. Ég vildi prófa mig áfram í hnetusmjörsgerð og hugsaði með mér hvað ef ég prófa að gera súkkulaðihnetusmjör? Ég átti kasjúhnetur upp í skáp og kakó og það var ekki aftur snúið! Ég ákvað að nota kasjúhnetur því ég átti þær til en í raun er hægt að nota hvaða hnetur sem er, jarðhnetur, heslihnetur, valhnetur eða jafnvel möndlur. Þið verðið að prófa en súkkulaðihnetusmjörið er æðislegt á súrdeigsbrauð og með jarðaberjum!

Innihald

  • 400 grömm af kasjúhnetum frá Himneskri Hollustu (eða aðrar hnetur/möndlur)
  • 2 msk kakó frá Himneskri Hollustu
  • 2 msk hlynsíróp frá Naturata (má sleppa)
  • Smá salt yfir kasjúhneturnar (má sleppa)

Aðferð:

*Fyrst skal rista hneturnar inn í ofni í ca. 10-15 mínútur við 150-160°C. Ef þið eruð að nota kasjúhnetur eins og ég þá er tíminn 20 mínútur inn í ofni og ef þið viljið þá er hægt að salta þær áður en þær fara inn í ofn. Þið dreifið hnetunum á bökunarplötu, stráið salti yfir eftir smekk og setjið þær inn í ofn. Ég vill benda á að gott er að fylgjast með þeim svo þær brenna ekki, sérstaklega síðustu 5 mínúturnar. 

*Það má sleppa þessu skrefi ef vill en persónulega finnst mér alltaf betra að rista hnetur eða möndlur því það hleypir svo miklu bragði út og tekur einnig styttri tíma að vinna úr þeim ef búið er að rista þær. 

Kasjuhnetur

Þegar búið er að rista hneturnar skal setja þær volgar í matvinnsluvélina ásamt kakóduftinu og hlynsírópinu. Næst er það bara að blanda blanda blanda! Hér kikkar óþolimæðin inn en þetta kemur allt saman á endanum! Þolimæði (og góð matvinnsluvél..) er lykillinn að góðu hnetusmjöri!

Fyrst verða hneturnar að grófu mjöli. Þið þurfið stoppa matvinnsluvélina, skrapa meðfram hliðunum og halda áfram að blanda nokkrum sinnum. Olían fer svo smá saman að losna úr hnetunum og verða þá hneturnar að deigi. Haldið áfram að blanda þar til þið fáið áferð sem ykkur líst vel á. Það er góð regla að blanda alltaf örlítið lengur en þú ætlaðir þér, 2-3 mínútum lengur. 

Sukkuladismyrja

Sukkuladismyrja01

Geymið súkkulaðihnetusmjörið í lokaðri krukku eða loftþéttu íláti. Það er hægt að geyma smjörið inn í ísskáp eða einfaldlega upp í skáp, á dimmum stað en ég geri það svo það helst mjúkt. Ég mæli með að klára smjörið innan 4-5 vikna upp á að bragðið helst sem best. Smyrjið á brauð, borðið með ferskum ávöxtum (mæli sérstaklega með jarðaberjum eða banana), setjið út á grautinn, jógúrtið eða bara hvað sem ykkur dettur í hug!

_MG_6894

Ef þið viljið fylgjast betur með mér getið þið fylgt mér á Instagram eða bætt mér við á Snapchat en ég er undir nafninu astaeats

Þangað til næst, verið heil og sæl! 

 

Þessi færsla er gerð í samstarfi við Himneska Hollustu

 

Höfundur: Asta Eats